برقٍ تلالا

برقٍ تلالا بعينها شاق الأنظار
نظراتهـا لا صرت مغبون تشفي

يا مقلةٍ تحكي عن الزين أسرار
هي وحدةٍ ربي خلقها وتكفي

قد خصها باللي لها مهجتي دار
هي عن هجير الشمس ظلٍ مع فيّ

قبل التقيها كنّ في خافقي نار
صابر على هم احتري يوم تلفي

ومن شفتها ضيعت أنا كل الأفكار
لا جيت أبوصفها عجز حيل حرفي

وأنا الذي طوعت قيفان الأشعار
تعجز بها الأفكار ويحيـر وصفي

معشوقتي نجمٍ ضوى بين الأنوار
ساطي ضياها ما لها شي يخفي

معشوقتي حشمة وهيبة ومقدار
حوريةٍ عن كل عذروب تصفي

معشوقتي سيدٍ على كل الأمهار
من فوق عرش الذوق والزين تغفي

يالله عساها من طويلات الأعمار
أسعد بها يالله والخيـر يلفي

واشوف يومٍ فيه عذال تحتار
في يوم يصبح كفها وسط كفي